ԿՐԹՈՒԹՅԱՆ ԵՎ ԳԻՏՈՒԹՅԱՆ ՀԱՄԱԿԱՐԳՈՒՄ ԿՈՌՈՒՊՑԻՈՆ ԵՐԵՎՈՒՅԹՆԵՐԻ ԴԵՄ ՊԱՅՔԱՐԻ 2013-2014 ԹՎԱԿԱՆՆԵՐԻ ՄԻՋՈՑԱՌՈՒՄՆԵՐԻ ՀԱՄԱԼԻՐ ԾՐԱԳԻՐ

http://edu.am/index.php?id=-5918&topMenu=13&menu1=-1&menu2=13&arch=0

ԳՊՀ ՀԱԿԱԿՈՌՈՒՊՑԻՈՆ ՓՈՐՁԸ

ԳԱՎԱՌԻ ՊԵՏԱԿԱՆ ՀԱՄԱԼՍԱՐԱՆԸ ԴԵՄ Է ԿՈՌՈՒՊՑԻԱՅԻՆ

ՈՒՍԱՆՈՂՆԵՐԸ ԵՎ ԱՇԱԿԵՐՏՆԵՐԸ ԴԵՄ ԵՆ ԿՈՌՈՒՊՑԻԱՅԻՆ

Հոկտեմբերի 15-ին Գավառի պետական համալսարանի Հրաչյա Աճառյանի անվան լսարանում տեղի ունեցավ սեմինար քննարկում Սևան քաղաքի Խաչատուր Աբովյանի անվան ավագ դպրոցի աշակերտների հետ: 

Ավագ դպրոցի իրավագիտական հոսքի աշակերտուհիներ Պիվազյան Արուսը, Պիվազյան Նոնան և Դավթյան Լուսինեն համալսարան էին եկել «Թափանցիկ կրթությունը Հայստանում» ծրագրի շրջանակներում հակակոռուպցիոն թեմայով քննարկում կազմակերպելու նպատակով` որպես օրեր առաջ իրենց դպրոցում Գավառի պետական համալսարանի ուսանողներ Հայարփի Մկրտչյանի և Գեղամ Աթեյանի կազմակերպած սեմինարի շարունակություն :

Աշակերտները շատ տպավորված էին քննարկման արդյունքներով: «Մենք ձեռք բերեցինք սեմինար քննարկումներ կազմակերպելու փորձ, հարստացրեցինք մեր իմացությունը «կոռուպցիա» հասկացության և դրա դեմ պայքարի միջոցների վերաբերյալ: Հուսով ենք, որ մեր դպրոցի և ԳՊՀ-ի համագործակցությունը կլինի շարունակական, միասին և վստահաբար «ոչ» կասենք կոռուպցիային»,- ասաց Արուս Պիվազյանը:

ԿՈՌՈՒՊՑԻԱՆ ՈՐՊԵՍ ԹԱՓԱՆՑԻԿ ԿՐԹՈՒԹՅԱՆԸ ԽՈՉԸՆԴՈՏՈՂ ԵՐԵՎՈՒՅԹ

Սեմինարին ներկա էին դպրոցի տարբեր հոսքերի 12-րդ դասարանի աշակերտներ, ինչպես նաև դպրոցի` ուսումնական գծով փոխտնօրեն Ալինա Բաբայանը:

Ծրագրի պատասխանատու Հայարփի Մկրտչյանը նախ ողջունեց ներկաներին, ապա ծրագրի համակարգողներ Գեղամ Աթեյանի և Վաղինակ Տեր-Հովհաննիսյանի հետ համատեղ նրանք աշակերտներին ներկայացրեցին իրենց ծրագրի էությունը:

Նրանք անդրադարձան կոռուպցիայի հասկացությանը, դրսևորման ձևերին, պատճառներին և հետևանքներին ու սոցիալական կյանքի տարբեր ոլորտներում ունեցած ազդեցություններին:

Կոռուպցիայի դեմ պայքարելը ենթադրում է կոռուպցիայի մասին անկաշկանդ և անվախ քննարկում, և այդ սոցիալական չարիքի մերժում:

Երկար քննարկումներից հետո աշակերտները եկան այն եզրակացության, որ կոռուպցիայի դեմ պայքարում արդյունքի հասնելու համար անհրաժեշտ է ամեն ինչ սկսել սեփական անձից, անհրաժեշտ է լինել կրթված, տեղեկացված, քաջատեղյակ սեփական իրավունքներին ու պարտականություններին: «Այդ դեպքում միայն կարող ենք հասնել ցանկալի արդյունքի և իրականացնել մեր առաքելությունը»,-համաձայնելով աշակերտների հետ` հավաստեց Հայարփի Մկրտչյանը:

Վերջում սեմինարի մասնակիցներին բաժանվեցին «ԳՊՀ-ն դեմ է կոռուպցիային» վերտառությամբ «հակակոռուպցիոն» գրիչներ և կոռուպցիայի դեմ պայքարի վերաբերյալ տեղեկատվական թերթիկներ:

ԳՊՀ-ՈՒՄ ԱՆԸՆԴՈՒՆԵԼԻ ԵՆ ԿՈՌՈՒՊՑԻՈՆ ԵՐԵՎՈՒՅԹՆԵՐԸ

Հունվար ամսից Գավառի պետական համալսարանում մեկնարկեց «Թափանցիկ կրթությունը Հայաստանում» ծրագիրը:

Հունվարի 24-ին տեղի ունեցավ հանդիպում «Թափանցիկ կրթությունը Հայաստանում» ծրագրի փորձագետ, դասընթացավար Աշոտ Հակոբյանի, ծրագրի ղեկավար Ինեսսա Հակոբջանյանի և ծրագրի համակարգող` Անժելա Սաղաթելյանի հետ:

Դասընթացը ներառում էր հետևյալ թեմաները` կոռուպցիայի հասկացությունը, տեսակները, հետևանքներն ու ազդեցությունները, պայքարի միջոցները: Դասընթացի ընթացքում հնչեցին բազմաթիվ կարծիքներ կոռուպցիայի վերաբերյալ: Ինչպես նշեց ծրագրի ղեկավար Ինեսա Հակոբջանյանը. «Այս հանդիպումը կնպաստի թափանցիկ կրթության, կոռուպցիայի դեմ պայքարի վերաբերյալ, երիտասարդության իրազեկության մակարդակի բարձրացմանը»:

Ծրագրի շրջանակում հաջորդ հանդիպումը կայացավ Դիլիջանում:

Մարտի 27-ին և 28-ին Դիլիջան քաղաքում` «Լեռնային Հայաստան» հյուրանոցում, «ՀԿ կենտրոն» քաղաքացիական հասարակության զարգացման ՀԿ-ի կողմից կազմակերպվել էին երկօրյա սեմինարներ «Ծրագրի կառավարում», «Ծրագրի առաջարկի կազմում և մշակում», «Շահերի պաշտպանության գործընթացում ԶԼՄ-ների ներգրավում» թեմաներով:

Սեմինարներին մասնակցում էին Գավառի պետական համալսարանի և Վանաձորի Եվրոպական կրթական տարածաշրջանային ակադեմիայի (ԵԿՏԱ) ուսանողները: Սեմինարավար Արփինե Հակոբյանի կողմից տեսական նյութը մատուցվեց մատչելի և հասկանալի ձևով, ինչն ավելի ամրապնդվեց գործնական աշխատանքների միջոցով: Խմբերի միջև ծավալվեց բուռն քննարկում: Նրանք «Կոռուպցիան կրթության ոլորտում» թեմայի վերաբերյալ առաջարկեցին մի շարք մոտեցումներ և մշակեցին ռազմավարություն` փորձելով գտնել ուղիներ դրանց լուծման համար:

Ուսանողները երկօրյա սեմինարների ընթացքում ստացած գիտելիքները հնարավորություն ստացան կիրառել գործնականում. նրանք պետք է ներկայացնեին մի քանի ծրագիր, որոնցից լավագույններին կտրամադրվեին դրամաշնորհներ:

Արդեն մայիսի սկզբին ուսանողները ձեռնամուխ եղան դրամաշնորհային ծրագրի հայտը ներկայացնելուն:

Գավառի պետական համալսարանը ներկայացրեց 3 ծրագիր, որոնցից 2 հաղթող ճանաչվեցին, համապատասխանաբար Հայարփի Մկրտչյանի և Նարեկ Կնյազյանի ծրագրերը:

Սեպտեմբեր ամսից արդեն սկսվել են նախապատրաստական աշխատանքները, որոնք այժմ ընթացիկ փուլում են:

ԳՊՀ-ՈՒՄ ԱՆԸՆԴՈՒՆԵԼԻ ԵՆ ԿՈՌՈՒՊՑԻՈՆ ԵՐԵՎՈՒՅԹՆԵՐԸ

«Շատ տպավորված եմ Գավառի պետական համալսարանի ուսանողներով, հստակ երևում է ուսանողների նվիրվածությունը «Թափանցիկ կրթությունը Հայաստանում» ծրագրին և թափանցիկ կրթություն ունենալու գաղափարին»,- ասաց Լյուբա Ֆայֆերը:

Այսօր Գավառի պետական համալսարանի ռեկտորի, պրոֆեսորադասախոսական անձնակազմի և ուսանողների հետ հանդիպեց ԱՄՆ Միջազգային զարգացման գործակալության Վաշինգտոնյան գրասենյակի Եվրոպայի և Եվրասիայի բյուրոյի կրթական ոլորտի խորհրդատու Լյուբա Ֆայֆերը, ով նաև «Թափանցիկ կրթությունը Հայաստանում» ծրագրի պատասխանատուն է Վաշինգտոնում:

Հանդիպման ընթացքում տեղի ունեցավ քննարկում կոռուպցիոն երևույթների և դրանց հետևանքների մասին: Քննարկվեցին կոռուպցիայի առաջացման հիմնական պատճառներն ու կոռուպցիոն երևույթների նվազեցման կառուցակարգերը: Գավառի պետական համալսարանի Ինֆորմատիկա և հաշվողական տեխնիկա բաժնի մագիստրատուրայի 1-ին կուրսի ուսանող Վարազդատ Ավետիսյանը նշեց, որ կրթության թափանցիկության համար անհրաժեշտ է բացառել մարդկային գործոնը քննությունների ընթացքում, այսինքն քննություններն ահրաժեշտ է իրականացնել համակարգչի միջոցով` ավտոմատացված համակարգով: Շեշտելով կրթական ոլորտում կոռուպցիոն երևույթների անընդունելի լինելը` Գավառի պետական համալսարանի և՛ պրոֆեսորադասախոսական կազմը և՛ ուսանողները բազմիցս նշեցին, որ Գավառի պետական համալսարանում անընդունելի և մերժելի են կոռուպցիոն երևույթները: